Пабычыла сьвет складанка самых сьвежых трэкаў ад беларускамоўных альтэрнатыўных гуртоў. Сярод удзельнікаў кампіляцыі – мэйнстрым беларускага цяжкага року: гурты Partyzone, Ściana, SOK, «Голая манашка», «Глюкі», ZM99 (экс-«Зьмяя»), UNIA, Tarpach ды іншыя.
Сьпіс трэкаў складанкі «Наша альтэрнатыва», падрыхтаванай «Фан-клюбам беларускай музыкі», зьмяшчае дваццатку самых актуальных песень новага музычнага сэзону. Гэта ўжо другі дыск выдадзены «Фан-клюбам». Першы – «Фэстывальны рух Беларусі» быў прысьвечаны гісторыі музычных фэстаў. На новым дыску прадстаўленыя кампазыцыі гуртоў з усёй Беларусі, а таксама Беласточчыны. «Наша альтэрнатыва» прэзэнтуе аматарам беларускай рок-музыкі некалькі новых імёнаў: два віцебскія гурты – JENOWA і LaBo, мэталкор-каманду intra muros зь Берасьця, ню-мэтал ад маладзечанцаў Ann Core, а таксама менскі рок-бэнд Lavatrina, які складаецца з былых музыкаў сталічных гуртоў «Мутнаевока» і «Крок».
Шэраг гуртоў бяруць удзел у складанцы з трэкамі альбо зь нядаўна выдазеных альбомаў (Глюкі «Ідыятызм», Nevma «Стыхія сьлёз», Zatoczka, міні-альбом Ściana «EP» ), альбо з кружэлак, рэліз якіх адбудзецца ў хуткім часе (Голая манашка «АлілуйА», максі-сынгл JENOWA «Жывыя», сынгл і рэміксы Glofira «Этот фильм»).
Беларускамоўны рок зь Беласточчыны прадставяць вядомыя па выступах на штогадовым фэстывалі «Басовішча» гурты 5set5 і RIMA. Апошнія – са сьвежавыдадзенага альбому «Kalevala».
«Фан-клюб» падрыхтаваў грунтоўны інфармацыйны буклет-укладыш, які ўтрымлівае звесткі пра гісторыю, склад, стыль, дыскаграфію і апошнія навіны прадстаўленых на кампіляцыі гуртоў.
Складанка «Наша альтэрнатыва» будзе распаўсюджвацца бясплатна на кампакт-дысках, а таксама ўсе трэкі ў mp3-фармаце будуць выкладзеныя для вольнага запампоўваньня на сайце belmusic org.
Для таго, каб атрымаць дыск бясплатна, трэба даслаць ліст на e-mail: fanclubbudzma@gmail.com – пазначыўшы свае кантакты.
Афіцыйная прэзэнтацыя складанкі мае адбыцца ў сярэдзіне кастрычніка на хвалях інтэрнэт-радыёстанцыі «АПЛЮС РОК».
Інфармацыйныя партнэры праекту – інтэрнэт-партал TUT BY, сайт грамадзкай кампаніі «Будзьма беларусамі», слушны музычны партал «Тузін гітоў», «Цэнтр Жывога Року», моладзевы праект «Твой стыль», ініцыятыва «Студфармат» і інш.
«Фан-клюб беларускай музыкі» – моладзевая ініцыятыва, якая мае на мэце дапамагаць музыкам і папулярызаваць айчынную музыку. Стаць сябрам фан-клюба вельмі проста. Для гэтага трэба проста даслаць ліст на e-mail: fanclubbudzma@gmail.com. Калі Вы маеце нейкую задуму, сябры суполкі дапамогуць яе рэалізаваць.
Адам Птушка
Spider
Позёров НЕТ - сайт о белорусской молодёжи (http://pozerov.net)
